Tropu acorru fait mali. Est nodiu. Ma parrit chi siat acanta de acabbai, fortzis fintzas innantis de a comenti scieus.
«Cunfroma a is nùmerus de su spratzinamentu de su Covid-19 si podit torrai a sa normalidadi, cun atentzioni ma prus a lestru, nci podit essi sa ripresa de su sistema economicu e produtivu, e lompi abellu abellu a una normalidadi noa de sa vida sotziali abetada de totus.»
Custu est su parris de su Presidenti de sa Regioni Sardigna Christian Solinas, chi impai a àterus dexi guvernadoris e is duus presidentis de Provintzias autonomas, totus de su Tzentru dereta, ant scritu a su Presidenti de sa Repùbblica Italiana Sergio Mattarella e a su Presidenti de su Consillu de is ministrus Giuseppe Conte pedendi prus autonomia cunfroma a restritzionis e cronogramma de s’ùrtimu Decretu Conte po su 4 de maiu chi benit.
«Su chi eus pregontau – at nau su guvernadori Christian Solinas – est in s’arrispetu de is autonomias e de poni in fatu misuras divressas.»
E is matessis chi una cida fait fiant inchietus contra a is espertus chi aiant nau ca non podiaus essi sa regioni “laboratòriu” po totu s’Italia, immò s’amostant diaderus belle e cuntentus. Nova prus bella non si podiat intendi. Est abellu aici. Bandat beni meda. Speraus! Poita chi capitat de depi torrau agou, is scientziaus su postu non nci ddu perdint, calicun’àteru bai e circa!
Guido Cadoni
