Fintzas sa scola sarda contra a Lucia Azzolina

Manifestatzioni de protesta lunis otu de làmpadas contra a sa ministra italiana de s’istrutzioni pùblica Lucia Azzolina. Adòbius in totu s’Itàlia, in Sardigna in Casteddu e in Tatari. Pruschetotu is insinnantis parrint contra a sa torrada in cabudanni cun is gabbias in plexiglass, chi si ndi podit fai de mancu, nanta is sindacaus, cun prus insinnantis e fadendi trumas de piciocheddus prus piticas; pagu su gosu fintzas po sa didàtica a distantza. Nodia a comenti DAD, s’aina no at postu totus de acòrdiu, at a essi po unu personali scolàsticu chi amancat de formatzioni, ma de no iscaresci nimancu su fatu ca sunt ancora medas is biddas sardas chene connessioni a sa retza internet. Podeus nai, chene timi de arrui in isbagliu, ca si aturat sa didàtica a distantza, su primu risurtau at a essi sa crescida de sa dispersioni scolastica; in una Sardigna abui ònnia dexi scientis ndi perdeus cuatru, cuatru chi non acabbant s’òbligu scolàsticu, calincunu non pigat mancu sa licentza mèdia, diaderus non si ddu podeus premiti. Po non narri de a comenti abbarrant foras, cun sa DAD, is scientis cun disabilidadis, e cussus chi po una arresoni o po un’àtera tenint prus abisùngiu de is insinnantis. Cun sa didàtica a distantza sa scola bessit classista, chi est nàsciu beni assortau at a sighì, chini parti mali, no abarrat mancu agou, si frimat. E in tempus de cuncursus no est mancau su manifestu po s’amparu de is precàrius: “Stabilizzati – no esodati: terza fascia in ruolo”; aici ant nau a boxi arta.
Sunt 5.000 is suplentis in Sardigna, calincunu est ingannurendisì, àterus sunt giai gannudus.
Guido Cadoni